Milani humbet pas 304 ditësh, Juventusi triumfon 3-1 në 'San Siro' dhe rifutet në garën e titullit

Pas 27 ndeshjesh, 304 ditësh dhe 10 muajsh Milani humbet një ndeshje në Serinë A. Kuqezinjtë humbën duelin e titullit ndaj Juventusit 3-1 por mbeten sërish në kryesimin e Serisë A pasi Interi nuk përfitoi dot. Kampionët në fuqi të Italisë ngritën kokë në “San Siro” dhe treguan se janë sërish favorit kryesor për titullin kampion. Pavarësisht mungesave në të dy ekipet për shkak të Covid ndeshja dhuroi spektakël dhe fraksioni i parë u mbyll në barazim me golat e Chiesa-s dhe Calabria. Miqtë nga Torino ishin më të fortë dhe e fituan ndeshjen në pjesën e dytë ku Federico Chiesa kompletoi dygolëshin personal dhe një tjetër gol e shënoi McKennie që mbylli llogaritë. 7 pikë larg kreut është Juventusi por me një ndeshje më pak.